Ի՞նչ կրնանք սորվիլ այսօր Բեթղեհէմի մանուկներէն
Քրիստոսի ծնունդը սովորաբար կը պատկերացնենք որպէս ուրախութեան, խաղաղութեան եւ յոյսի պատմութիւն։ Սակայն Սուրբ Ծննդեան պատմութեան մէջ կայ նաեւ շատ ցաւալի էջ մը։
Երբ Հերովդէս թագաւորը լսեց, թէ ծնած է «Հրեաներու Թագաւորը», ան վախցաւ իր իշխանութիւնը կորսնցնելու գաղափարէն։ Իր իշխանութիւնը պաշտպանելու համար հրամայեց սպաննել Բեթղեհէմի երկու տարեկան եւ անկէ փոքր բոլոր տղայ մանուկները (Մատթէոս 2.16–18)։
Այս անմեղ մանուկները երբեք չգիտցան, թէ ինչու զոհ դարձան, սակայն Եկեղեցին զանոնք կը յիշէ որպէս Քրիստոսի առաջին նահատակները։ Անոնք իրենց կեանքը կորսնցուցին Քրիստոսի պատճառով եւ այդ պատճառով արժանացան երկնային պսակին։
Ի՞նչ կը նշանակէ այս պատմութիւնը մեզի համար
Այս պատմութիւնը միայն անցեալի ողբերգութիւն մը չէ։ Ան մեզի կը յիշեցնէ, թէ Քրիստոսի լոյսը աշխարհ գալով՝ անմիջապէս հանդիպեցաւ խաւարի դիմադրութեան։
Այսօր ալ շատ երիտասարդներ կրնան զգալ այդ պայքարը իրենց առօրեային մէջ։ Երբ կը փորձենք ապրիլ քրիստոնէական արժէքներով, երբ ճշմարտութեան, արդարութեան կամ հաւատքի կողքին կը կանգնինք, միշտ չէ որ դիւրին կ’ըլլայ այդ ճամբան։ Աշխարհը յաճախ կ’առաջարկէ ուրիշ ուղիներ, որոնք աւելի հեշտ կը թուին։
Բեթղեհէմի մանուկները մեզի կը յիշեցնեն, որ Աստուծոյ ծրագիրը շատ աւելի մեծ է, քան այն, ինչ մենք կը տեսնենք մեր աչքերով։ Չարը կրնայ փորձել կանգնեցնել Աստուծոյ գործը, բայց երբեք չի կրնար յաղթել Աստուծոյ սիրոյն եւ ճշմարտութեան։
Մտածելու համար
- Ի՞նչ բաներ այսօր կը փորձեն հեռացնել զիս Քրիստոսէն։
- Երբ դժուարութիւններու կը հանդիպիմ, արդեօք կը վստահի՞մ Աստուծոյ ծրագիրին։
- Ինչպէ՞ս կրնամ Քրիստոսի լոյսը տարածել իմ ընկերներուս, ընտանիքիս եւ համայնքիս մէջ։
Աղօթք
Սուրբ Մանկունք Բեթղեհէմի,
դուք որ անմեղութեամբ եւ մաքրութեամբ արժանացաք Աստուծոյ Արքայութեան,
բարեխօսեցէք մեզի համար,
որպէսզի մեր երիտասարդութեան տարիներուն
հաւատարիմ մնանք Քրիստոսի սիրոյն,
քաջութեամբ դիմագրաւենք փորձութիւնները
եւ միշտ քալենք Անոր լոյսին մէջ։ Ամէն։
Յակոբ Սրկ․ Կիրակոսեան