St. Mary Armenian Apostolic Church added 2 new photos.

12 hours ago

ՀԱՅ ԱՒԵՏԱՐԱՆԱԿԱՆ ԵԿԵՂԵՑՒՈՅ ՀՈԳԵՒՈՐԱԿԱՆՆԵՐՈՒ ԱՅՑԸ Ս. ԱՍՏՈՒԱԾԱԾԻՆ ԵԿԵՂԵՑԻ

Հայ Աւետարանական Եկեղեցւոյ հիմնադրութեան 180-ամեակի տօնակատարութիւնը գեղեցիկ առիթ մը հանդիսացաւ՝ վերահաստատելու հայ եկեղեցիները միաւորող եղբայրական սիրոյ, փոխադարձ յարգանքի եւ համագործակցութեան ոգին։

Այս առիթով, Ուրբաթ, 30 Հոկտեմբեր 2026-ին, Ս. Աստուածածին Հայ Առաքելական Եկեղեցին հիւրընկալեց Թորոնթոյի եւ արտասահմանի հայ աւետարանական համայնքներու հոգեւոր ներկայացուցիչները, որոնք քաղաքս կը գտնուին՝ մասնակցելու յոբելենական հանդիսութիւններուն։

Այցելող հոգեւորականներն էին՝ Հիւսիսային Ամերիկայի Հայ Աւետարանական Միութեան հովիւ Վեր. Հենրիկ Շահնազարեան, Յունաստանի Հայ Աւետարանական Եկեղեցւոյ հոգեւոր հովիւ Վեր. Վիգէն Չոլաքեան, Թորոնթոյի Հայ Աւետարանական Եկեղեցւոյ հոգեւոր հովիւ Վեր. Զօհրապ Սարգիսեան, Փասատինայի Հայ Եղբայրութեան Աստուածաշունչի Եկեղեցւոյ հոգեւոր հովիւ Վեր. Վաչէ Էքմէքճեան եւ Թորոնթոյի Հայ Եղբայրութեան Աստուածաշունչի Եկեղեցւոյ հոգեւոր հովիւ Վեր. Արա Պալըքճեան։ Անոնց կ՚ընկերակցէր Թորոնթոյի Հայ Եկեղեցիներու Միջյարանուանական Յանձնախումբի ատենապետ Տիար Յակոբ Ճանպազեան։

Եկեղեցւոյ հոգեւոր տեսուչ Գերպ. Տ. Գարեգին Ծ. Վրդ. Շխրտմեան եւ հոգեւոր հովիւ Արժ. Տ. Տաթեւ Ա. Քհնյ. Միքայէլեան սիրով ողջունեցին հիւր հոգեւորականները եւ Ս. Աստուածածին Եկեղեցւոյ ընտանիքին անունով իրենց ջերմ շնորհաւորութիւնները փոխանցեցին Հայ Աւետարանական Եկեղեցւոյ հիմնադրութեան 180-ամեակին առիթով՝ մաղթելով, որ Աստուած շարունակէ օրհնել անոր հոգեւոր ծառայութիւնն ու առաքելութիւնը։

Հանդիպման ընթացքին Ս. Աստուածածին Եկեղեցւոյ հոգեւորականները ներկայացուցին եկեղեցւոյ պատմութիւնը, անոր հոգեւոր ու ազգային առաքելութիւնը, ինչպէս նաեւ անդրադարձան նոր սերունդներուն քրիստոնէական հաւատքն ու հայկական ինքնութիւնը փոխանցելու կարեւորութեան։

Եղբայրական մթնոլորտի մէջ տեղի ունեցած զրոյցին առանցքը կազմեցին հայ եկեղեցիներու հասարակաց քրիստոնէական արժէքները, մեր ժողովուրդին հոգեւոր կեանքին ծառայելու կոչումը եւ միջեկեղեցական յարաբերութիւններու շարունակական ամրապնդման կարեւորութիւնը։

Հանդիպումը եզրափակուեցաւ միասնական աղօթքով եւ եղբայրական սիրոյ արտայայտութիւններով՝ վերահաստատելով այն համոզումը, որ Քրիստոսի հանդէպ հասարակաց հաւատքը ամուր հիմք կը հանդիսանայ փոխադարձ յարգանքի, միասնութեան եւ ծառայութեան։

Ս. Աստուածածին Եկեղեցին իր ուրախութիւնը կը յայտնէ այս եղբայրական այցելութեան առիթով եւ Հայ Աւետարանական Եկեղեցւոյ հիմնադրութեան 180-ամեակին կապակցութեամբ կը մաղթէ անոր առաքելութեան շարունակական բարգաւաճում եւ նորանոր ձեռքբերումներ՝ ի փառս Աստուծոյ եւ ի բարօրութիւն հայ ժողովուրդին։ ... See MoreSee Less

St. Mary Armenian Apostolic Church added 5 new photos.

2 days ago

Ս.ՀԱՂՈՐԴՈՒԹԵԱՆ ՄԱՏԱԿԱՐԱՐՈՒՄ ՀԱՅ ՏԱՐԵՑՆԵՐՈՒՆ

Չորեքշաբթի 28-Հոկտ. 2026-ին, Թորոնթոյի Ս.Աստուածածին Եկեղեցւոյ Հոգեւոր Հովիւ՝ Արժ.Տէր Տաթեւ Ա.Քհնյ.Միքայէլեան ընկերակցութեամբ, ՀՕՄ-ի “Ռուբինա” Մասնաճիւղի Ընկերային Ծառայութեան յանձնախումբին այցելեցին, Fieldstone Commons Արարատ Հայ բաժնի տարեցներուն: Արժ.Տէր Հայրը, յատուկ աղօթք եւ Ս.Հաղորդութիւն մատակարարելէ եւ սեղանի օրհնութիւն կատարելէ ետք, ՀՕՄ-ի ընկերուհիները կէսօրուան ճաշ հրամցուցին պատսպարեալներուն ... See MoreSee Less

St. Mary Armenian Apostolic Church added 22 new photos.

3 days ago

«ՅԻՍՈՒՍԻ ՓՈՔՐԻԿՆԵՐԸ» ԿԸ ՆՇԵՆ ՍՐԲՈՑ ԹԱՐԳՄԱՆՉԱՑ ՏՕՆԸ

Շաբաթ 24 Հոկտեմբեր 2026-ին, «Յիսուսի Փոքրիկները» հերթական անգամ համախմբուեցան՝ մասնակցելու հոգեւոր, կրթական եւ մշակութային հետաքրքրական գործունէութիւններով հարուստ յայտագիրի մը։

Հանդիպումի ընթացքին փոքրիկները սորվեցան Սաղմոս 118-էն համար մը՝ Աստուծոյ Խօսքին հետ իրենց ծանօթութիւնը խորացնելով եւ քրիստոնէական արժէքները իրենց փոքր տարիքէն սրտերուն մէջ արմատաւորելով։

Անցնող Սրբոց Թարգմանչաց Տօնին առթիւ, յայտագիրին նուիրուած էր հայ երաժշտութեան եւ հայոց գիրերու գիւտին։ Փոքրիկները ունկնդրեցին աշխարհահռչակ հայ երգահան Արամ Խաչատուրեանի «Վարդագոյն աղջիկներու պարը» ստեղծագործութիւնը եւ երաժշտութեան կշռոյթին համահունչ մարզական շարժումներ կատարեցին։ Այս գործունէութեան նպատակն էր շարժումի եւ խաղի ճամբով փոքրիկներուն մէջ հետաքրքրութիւն եւ սէր արթնցնել հայ երաժշտութեան ու մշակութային հարուստ ժառանգութեան նկատմամբ։

Այնուհետեւ, ձեռնոցային տիկնիկներով ներկայացուեցաւ հայոց գիրերու գիւտի պատմութիւնը։ Մանուկներուն մատչելի եւ պատկերաւոր այս ներկայացումը առիթ հանդիսացաւ, որ անոնք ծանօթանան Ս. Մեսրոպ Մաշտոցի մեծագործութեան եւ անդրադառնան հայոց այբուբենի անգնահատելի արժէքին։

Գործնական աշխատանքին ընթացքին փոքրիկները պատրաստեցին իրենց «Այբուբենի պարտէզը»՝ անոր վրայ արձանագրելով իրենց անունները, թափ տալով անոնց ձեռային հմտութեան, երեւակայութեան բայց մանաւանդ հայոց գիրերուն նկատմամբ իրենց հետաքրքրութիւնն ու հարազատութիւնը։

Ուրախ մթնոլորտի մը մէջ, հանդիպումը եզրափակուեցաւ հիւրասիրութեամբ։ Իսկ յաջորդ հաւաքը տեղի պիտի ունենայ Շաբաթ, 7 Նոյեմբերին։ ... See MoreSee Less

St. Mary Armenian Apostolic Church added 5 new photos.

5 days ago

ՍՈՒՐԲ ԵՒ ԱՆՄԱՀ ՊԱՏԱՐԱԳ ՍՈՒՐԲ ԽԱՉԻ ԳԻՒՏԻ ՏՕՆԻՆ

Կիրակի, 25 Հոկտեմբեր 2026-ին, Սուրբ Խաչի Գիւտի Տօնին, Ս. Աստուածածին եկեղեցւոյ մէջ Սուրբ եւ Անմահ Պատարագ մատուցուեցաւ նախագահութեամբ Գանատայի Հայոց Թեմի Առաջնորդ՝ Գերշ. Տ. Բաբգէն Ս. Արք. Չարեանի։

Սուրբ Պատարագը մատուցեց եւ օրուան խորհուրդին նուիրուած քարոզը փոխանցեց Վանքուվըրի Ս. Գրիգոր Լուսաւորիչ եկեղեցւոյ հոգեւոր տեուչ՝ Գերպ. Տ. Վարդան Ծ. Վրդ. Թաշճեան։

Թող Քրիստոսի կենարար Խաչը միշտ մեր հաւատքին զօրութիւնը, մեր յոյսին ամրութիւնը եւ մեր կեանքին առաջնորդող լոյսը ըլլայ։ ... See MoreSee Less