Մեծ Պահոց չորրորդ կիրակին կը կոչուի «Տնտեսի» Կիրակի: Քրիստոսի պատմած գեղեցկագոյն առակներէն է: Այս առակը դժուարիմաստ է խորքին մէջ, եթէ նիւթական անկիւնէն դիտուի հարցը, բայց իրականութեան մէջ, Յիսուս կը փորձէ շօշափելիօրէն հասկցնել մարդուն, թէ ինչպէ՞ս կը կայանայ նիւթականի եւ բարոյականի փոխ յարաբերութիւնները:
«Տնտեսի» առակը իր մէջ ճշմարտութիւններ կը բովանդակէ, որոնք հոգեւոր են, այլ խօսքով՝ մարդու հոգիի փրկութեան վերաբերող իրականութիւններ կան հոն: Պատասխանատուութեան զգացումի եւ պարտականութեան գիտակցութեան եւ առաքինի կեանքի կը հրաւիրէ քրիստոնեայ հաւատացեալին:
Մեր Տէրը՝ Յիսուս Քրիստոս կը թելադրէ, որ մենք եւս շահինք Աստուծոյ բարեկամութիւնը: Աստուծոյ հետ բարեկամանալու համար հարկ է նախ մեղքէն հեռանալ: Տիրոջ հետ միանալու միակ միջոցը չարէն ու անոր գայթակղութիւններէն անջատուիլն է, «ես-էն» ու անոր կործանարար բնութենէն հրաժարիլ: Առակին մէջ, տանուտէրը Աստուած է, իսկ տնտեսը մարդը, աշխարհի հարստութիւնները եւ ստացուածքները Աստուծմէ տրուած բարիքներ են՝ տրամադրուած, մարդը անոնց տէրը չէ, այլ մատակարարող պաշտօնեան՝ «Տնտես»ն է:
Աստուած այս աշխարհի բարիքները մարդուն յանձնած է, զանոնք գործածելով հանդերձեալ կեանքի տիրանալու:
Առակին հիմնական նպատակն է, թէ մարդ պարտաւոր է, այս աշխարհէն ստացած բարիքներէն բաժին հանել, օգնել, նպաստել, ողորմիլ իր նմանին, որպէսզի ժառանգէ յաւիտենական կեանքը:
Մեր Տէրը՝ Յիսուս Քրիստոս կը թելադրէ, որ մենք եւս շահինք Աստուծոյ բարեկամութիւնը: Աստուծոյ հետ բարեկամանալու համար հարկ է նախ մեղքէ հեռանալ: Տիրոջ հետ միանալու միակ միջոցը չարէն ու անոր գայթակղութիւններէն անջատուիլն է, մեր «ես-էն» ու անոր կործանարար բնութենէն հրաժարիլ:
Թող ամենաբարին Աստուած շնորհքի եւ հաւատքի թթխմորը առատացնէ մեր մէջ, որպէսզի խմորէ ամբողջ զանգուածը՝մեր էութեան:
Տաթեւ Ա. Քհնյ. Միքայէլեան