«ԴՈՒՆ ՇՆՈՒԹԻՒՆ ՄԻ՛ ԸՆԵՐ»։
- Ի՞նչ կ’արգիլէ Աստուած Եօթներորդ Պատուիրանով։
Ամէն տեսակ մեղք՝ կապուած հեշտասիրութեան, պղծութեան եւ անպարկեշտութեան հետ։
- Ե՞րբ կը զանցենք այս Պատուիրանը։
Ամէն անգամ, երբ անմաքուր խորհուրդներով, անպարկեշտ վարքով ու խօսակցութեամբ, եւ յատկապէս շնութեամբ ու պոռնկութեամբ կը կորսնցնենք մեր հոգիին եւ մարմնին մաքրութիւնը։
3. Ի՞նչ հոգածութիւն պէտք է ունենանք մեր մարմիններուն հանդէպ։
Պէտք է հոգ տանիլ եւ խնամել մեր մարմինները՝ զանոնք մաքուր պահելու համար, որովհետեւ քրիստոնեային մարմինը Սուրբ Հոգիին տաճարն է, ինչպէս Առաքեալը կ’ըսէ.
«Չէ՞ք գիտեր, թէ դուք Աստուծոյ տաճարն էք, եւ Աստուծոյ Հոգին ձեր մէջ կը բնակի։ Եթէ մէկը Աստուծոյ տաճարը պղծէ, Աստուած զայն պիտի կործանէ, որովհետեւ Աստուծոյ տաճարը սուրբ է, եւ դուք այդ տաճարն էք»։
4. Ինչո՞ւ պղծութիւնը եւ անպարկեշտութիւնը շատ ծանր մեղքեր են։
Որովհետեւ անոնք հակառակ են բնական մաքրութեան եւ ամօթխածութեան, եւ միշտ մեծ վնաս կը պատճառեն անպարկեշտ կեանք վարողներուն երջանկութեան։
5. Ինչպէ՞ս կը վնասեն անոնք։
Անոնք կը քայքայեն անոնց նիւթական վիճակը եւ առողջութիւնը, եւ պատճառ կը դառնան զանազան հիւանդութիւններու։ Անոնք զիրենք կրնան ժամանակէն առաջ գերեզման առաջնորդել։
6. Ուրիշ ի՞նչ վնասներ կը պատճառէ անպարկեշտութիւնը։
Ան բարոյապէս կը սպաննէ մարդը, կը խայտառակէ եւ կը թունաւորէ անոր կեանքը, եւ կ’առաջնորդէ դէպի ծայրայեղ աղքատութիւն, թշուառութիւն եւ, ի վերջոյ, յուսահատութիւն։
7. Ինչո՞ւ շնութիւնը մեծագոյն յանցանքներէն մէկն է։
Որովհետեւ՝
- ան ամուսնական սրբազան ուխտի խախտում մըն է.
- ան իր ետեւէն կը բերէ անհամար չարիքներ, ինչպէս՝ անտէր եւ անխնամ երեխաներու աճը, կեղծաւորութիւնը, սուտը, խանդը, վրէժխնդրութիւնը, խելագարութիւնը եւ շատ անգամ՝ մահը։
8. Ի՞նչ պատիժի արժանի են Եօթներորդ Պատուիրանը զանց ընողները։
Եօթներորդ Պատուիրանին դէմ գործուած մեղքերը այնքան սոսկալի են, որ Աստուծոյ բարկութիւնը ահաւոր պատիժով պիտի այցելէ անոնք, որոնք իրենց կեանքը կ’անցընեն այս գարշելի մեղքերուն մէջ։
9. Սուրբ Գիրքին մէջ ի՞նչ օրինակ կը գտնենք ասոր մասին։
Մաքրութեան դէմ գործուած մեղքերը այնքան ատելի էին Աստուծոյ, որ Ան ջրհեղեղով կործանեց ամբողջ մարդկութիւնը, որովհետեւ մարդկութիւնը ապականած էր նման գարշելի մեղքերու ամէն տեսակով։
10. Նոյն պատճառով Աստուած կրակով եւ ծծումբով կործանեց Սոդոմն ու Գոմորը։
Եւ մէկ օրուան մէջ քսանչորս հազար իսրայէլացիներ կործանեց՝ այս Պատուիրանը խախտելուն համար։
11. Ի՞նչ կը գրէ Առաքեալը քրիստոնեաներուն այս նիւթին մասին։
Պղծութեան հետ կապուած գարշելի մեղքերը այնքան հակառակ են քրիստոնէական սրբութեան, որ Պօղոս Առաքեալ կը գրէ, թէ անոնց անուններն իսկ պէտք չէ արտասանել (Եփես. Ե. 3-12)։ Ան նաեւ կ’ըսէ.
«Որովհետեւ այս բանը գիտէք, թէ ոչ մէկ պոռնիկ, ոչ մէկ անմաքուր մարդ եւ ոչ մէկ ագահ, որ կռապաշտ է, Քրիստոսի եւ Աստուծոյ արքայութեան մէջ ժառանգութիւն պիտի ունենայ»։
12. Որո՞նք են հեշտասիրութեան եւ պղծութեան հակառակ առաքինութիւնները։
Մաքրութիւնը եւ ամօթխածութիւնը։
13. Ինչպէ՞ս կարելի է պահպանել մաքրութիւնը։
Մաքրութիւնը պահպանելու գլխաւոր միջոցներն են՝
- Միշտ յիշել, որ մենք Աստուծոյ ներկայութեան մէջ ենք, որ Ան կը տեսնէ բոլոր գաղտնի բաները. հետեւաբար աղօթքով պէտք է խնդրենք Աստուծմէ, որ մեզ պահէ փորձութենէն։
- Աշխատասէր եւ ժուժկալ կեանք վարել եւ երբեք պարապ չմնալ։
- Մերժել անպարկեշտ վէպեր կամ այլ անբարոյ գրքեր կարդալ, եւ չլսել անպարկեշտ երգեր։
14. Ի՞նչ վնաս կը պատճառէ անպարկեշտ խօսակցութիւնը երիտասարդներուն։
Անպարկեշտ խօսակցութիւնը կը թունաւորէ երիտասարդներուն անմեղ հոգիները։ Անոնք աստիճանաբար կը վարժուին զգայական մեղքերու եւ իրենց մաքուր սրտերուն մէջ արատներու սերմերը կը ցանեն։
Ուստի երիտասարդները պէտք է խուսափին անոնց ընկերակցութենէն, որոնք անպարկեշտ նիւթերու մասին կը խօսին՝ յիշելով Քրիստոսի զգուշացումը, թէ մենք հաշիւ պիտի տանք ամէն պարապ խօսքի եւ մանաւանդ մեղաւոր խօսքերու համար (Մատթ. ԺԲ. 36)։
15. Ինչո՞ւ համար Աստուած մեզի խօսելու ազնիւ կարողութիւնը տուած է։
Աստուած մեզի խօսելու ազնիւ կարողութիւնը տուած է, որպէսզի օրհնենք եւ փառաւորենք Զինք, եւ մեր եղբայրները մխիթարենք ու խրատենք, եւ ոչ թէ մեր բերանները պղծենք գարշելի խօսքերով։
16. Ի՞նչ կը պատուիրէ Առաքեալը այս մասին։
«Ոչ մէկ ապականած խօսք թող դուրս գայ ձեր բերաններէն, այլ միայն այն՝ որ բարի է եւ շինիչ, որպէսզի շնորհք տայ անոնց, որոնք կը լսեն։ Եւ մի՛ տրտմեցնէք Աստուծոյ Սուրբ Հոգին, որուն կնիքով կնքուած էք փրկութեան օրուան համար»։ (Եփես. Դ. 29)
17. Ի՞նչ կը գրէ Առաքեալը վատ ընկերակցութեան չար ազդեցութեան մասին։
Պօղոս Առաքեալ հաւատացեալները կը զգուշացնէ, թէ վատ ընկերներու անպարկեշտ խօսքերը աստիճանաբար կ’ապականեն մարդու բարի բնաւորութիւնը։
«Չար ընկերակցութիւնները կը փճացնեն բարի բարքերը»։ (Ա. Կորնթ. ԺԵ. 33)
18. Ո՞ր երիտասարդներն են երջանիկ եւ օրհնեալ։
Երջանիկ եւ օրհնեալ են այն երիտասարդները, որոնք իրենց ծնողներուն խոհեմ հսկողութեամբ հեռու կը մնան վատ ընկերներէ եւ այնպիսի զուարճութիւններէ, որոնք կը փճացնեն իրենց բարքերը։
Անոնք կը մեծնան սրտով եւ մարմնով մաքուր, եւ ազատ կը մնան անպատշաճ ցանկութիւններէ։ Այսպէս անոնք կը դառնան արժանի քրիստոնեայ այրեր եւ կիներ, որոնք ամէնուրեք յարգանք կը վայելեն։
19. Շքեղ հագուստներու հանդէպ սէրը եւ սիրաբանելու կամ ցուցամոլութեան հակումն ալ մեղքի պատճառ կրնա՞ն ըլլալ։
Այո՛։ Կիներուն մօտ ցուցամոլութիւնը կամ հագուստներու հանդէպ չափազանց սէրը կրնան աստիճանաբար զիրենք առաջնորդել դէպի մեղքեր։
Քրիստոնեայ կնոջ ճշմարիտ զարդը ներկը, շքեղ հագուստները, ոսկին կամ թանկարժէք զարդերը չեն, այլ՝ ամօթխածութիւնը եւ պարկեշտ վարքը։
20. Ինչո՞ւ։
Որովհետեւ գեղեցկութիւնը ի վերջոյ պիտի քայքայուի հիւանդութեամբ եւ ծերութեամբ, հագուստները պիտի մաշին, ոսկին կրնայ կորսուիլ կամ գողցուիլ, բայց առաքինութիւնն ու ամօթխածութիւնը միշտ կը մնան անապականելի։
(Քաղուած՝ Խորէն Արք. Նարպէյի «Կանոն Քրիստոնէական Դաստիարակութեան» հատորէն)